གནས་མཇལ་ལ་འགྲོ་སྐབས།
༈ ཐེངས་ཤིག་ཨ་ཁུ་བསྟན་པ་ལྷ་སར་གནས་འཇལ་ལ་འགྲོ་བའི་ལམ་དུ། གནས་མཇལ་བ་གཞན་ཞིག་དང་ཐུག་འཕྲད་བྱུང་བ་རེད། གནས་མཇལ་བ་དེས་ཨ་ཁུ་ལཁྱེད་རང་གི་མིང་ལ་ག་རེ་ཞུ་གི་ཡོད་དམ། ཞེས་དྲིས་པར། ཨ་ཁུས། ངའི་མིང་ལ་རྐུབ་ཅེེས་བརྗོད་ཀྱི་ཡོད། ཅེས་ལན་བཏབ་པས། གནས་མཇལ་བ་དེས་ཨ་ཁུའི་མིང་ལ་རྐུབ་ཅེས་བརྗོད་ཀྱི་ཡོད་ཤག་བྱས་ཏེ་སེམས་ལ་ངེས་བརྟན་བྱས་པ་རེད། དགོང་དྲོ་ས་རུབ་སྐབས་ཁོང་གཉིས་གནས་ཚང་གཞན་དག་མ་ཐོབ་པས་དགོན་པ་ཞིག་གི་དཀོན་གཉེར་ལ་གནས་ཚང་གཡར་པོ་ཞུས། དཀོན་གཉེར་དེར་རང་ཉིད་ལ་སྡོད་ཁང་ཆུང་ངུ་ཞིག་ལས་མེད་སྟབས་ཨ་ཁུ་དང་གནས་མཇལ་བ་དེ་དགོན་པའི་ནང་དུ་བཞག་པ་རེད། མཚན་དགུང་ལ་ཨ་ཁུ་གྲོད་པ་ན་སྟེ་དགོན་པའི་ནང་བཙོག་པ་ཤོར་བར་བརྟེན་ཨ་ཁུས་གནས་མཇལ་བ་དེར་གང་ཡང་མ་ལབ་པར་ཞོགས་པ་སྔ་པོ་ནས་ལངས་ཏེ་ཐོན་ཕྱིན་པ་རེད། དེ་ནས་དུས་ཚོད་ཏོག་ཙམ་ཞིག་གི་རྗེས་སུ་དཀོན་གཉེར་དེ་སླེབས་ཏེ་དགོན་པ་བཙོག་དྲིས་གང་ནས་ཡོད་པས་གནས་མཇལ་བ་དེར། ཀྭས། འདི་ཚོ་སུས་བཏང་སོང་ངམ། ཞེས་དྲིས་པར། གནས་མཇལ་བ་དེས། དཀོན་གཉེར་ལགས། ང་མིན། རྐུབ་ཀྱིས་བཏང་སོང་། ཞེས་བཤད་པར། དཀོན་གཉེར་དེས། རྐུབ་ཁྱེད་རང་གི་མ་རེད་པས། ཨ། ཞེས་བརྗོད་དེ་ཁོ་ལ་ཉེས་རྡུང་མང་པོ་བཏང་ཡོད་འདུག
0 comments:
Post a Comment